Salam Machhli Shahri
thoḌi der ai saaqi bazm men ujala hai
jaam ḳhali hone tak chand Dhalne vaala hai
sub.h ki hasin kirnen naag ban ke Das lengi
main inhen samajhta huun main ne un ko paala hai
bazm-e-nau ki sham.on ko ye ḳhabar nahin hogi
kis ne zulmat-e-shab ko raushni men Dhala hai
kis ne ḳhvab-e-insan ke nuqra.i safine ko
saḳht-tar talatum ki zad men bhi sambhala hai
log hans ke kah denge main ḳharab-e-sahba tha
mai-kada ye ḳhush hoga us ka bol-bala hai
meri fikr ki ḳhushbu qaid ho nahin sakti
yuun to mere honTon par maslahat ka taala hai
meri maut ai saaqi irtiqa hai hasti ka
ik ‘salam’ jaata hai ek aane vaala hai
Leave a Reply