apne hone ke jo asar banane hain mujhe
jaane kitne dar-o-divar banane hain mujhe
ḳhud ko rakhna bhi nahin jins-e-giran ki surat
bikne valon ke bhi me.aar banane hain mujhe
tere qadmon men bichhane hain zamini raste
aur apne liye kohsar banane hain mujhe
apne jaisa koi dushman bhi zaruri hai bahut
tere jaise bhi ka.i yaar banane hain mujhe
silsila TuuT na jaa.e miri vahshat ka kahin
naqsh qadmon ke lagatar banane hain mujhe
tu kabhi dhuup men nikle bhi to chhanv men rahe
raste aur bhi chhitnar banane hain mujhe
main rahun ya na rahun teri kahani to rahe
apne jaise ka.i kirdar banane hain mujhe
Leave a Reply