Poet
hoti hai tabi.at hi ḳhuda-dad kisi ki
ulfat men vafa.en nahin ijad kisi ki
nakam phiri arsh se fariyad kisi ki
kis dar se umiden huiin barbad kisi ki
allah re pabandi-e-adab-e-mohabbat
fariyad bhi goya nahin azad kisi ki
aa ai gham-e-dauran tujhe siine se laga luun
bhule se bhi aati nahin ab yaad kisi ki
unvan-e-mohabbat hai nigah-e-ghalat-andaz
mustaghni-e-tamhid hai rudad kisi ki
miTte hue is tarah kisi ko nahin dekha
jis tarah se hasti hui barbad kisi ki
afsana-e-farhad ki tamhid uTha.i
hamraz magar kah gaya rudad kisi ki
gustaḳh tamannaon ne kya chheḌ diya hai
sharma.i hui dil men hai kyon yaad kisi ki
kis dard bhare dil ki ‘munir’ aah sada hai
ik paikar-e-betab hai fariyad kisi ki
Leave a Reply