Tanveer Ahmad Alvi
kya zaruri hai koi be-sabab azar bhi ho
sang apne liye shishe ka talabgar bhi ho
dilbari husn ka sheva hai magar kya kiije
ab ye lazim to nahin husn vafadar bhi ho
zaḳhm-e-jan vaqt ke kanTon se bhi sil sakta hai
kya zaruri hai ki resham ka koi taar bhi ho
fasla rakhiye dilon men magar itna bhi nahin
darmiyan jaise koi ahani divar bhi ho
do kinaron ki tarah saath hi chalte rahiye
ab zaruri to nahin koi sarokar bhi ho
koi is dard ke rishte ko nibha.e kyuun kar
charasazi jo kare vo koi gham-ḳhvar bhi ho
shisha-e-jan ko bachane ki ye koshish ‘tanvir’
shayad is shahr-e-sitam ke liye bekar bhi ho
Leave a Reply