Haseebul Hasan
apni hasti ke kamalat se bahar nikle
vo agar mere ḳhayalat se bahar nikle
dafn kar rakkhe the siine ke kisi kone men
raaz jo tere savalat se bahar nikle
ishq kha.ega nahin yaar ye va.ada hai mira
us se kah do ki vo ḳhadshat se bahar nikle
us ke va.adon pe bhi kar lenge bharosa vo agar
shahr-e-kufa ke mazafat se bahar nikle
us ki ankhon ne pukara to gine tak na ga.e
rind kitne hi ḳharabat se bahar nikle
aur bhi ḳhali hain duniya men Thikane lakhon
us se kah do ki miri zaat se bahar nikle
Leave a Reply