har sher se mere tira paikar nikal aa.e
manzar ko haTa kar pas-e-manzar nikal aa.e
ye kaun nikal aaya yahan sair-e-chaman ko
shaḳhon se mahakte hue zevar nikal aa.e
is baar bulave men kisi mah-jabin ke
vo zor-talab tha ki mire par nikal aa.e
ye vasl sikandar ke muqaddar men nahin tha
ham kaise muqaddar ke sikandar nikal aa.e
shab aa.i to zulmat ki mazammat men sitare
divar-e-falak toḌ ke bahar nikal aa.e
us baat ka andhi ko guman bhi nahin hoga
lo ek thi fanus bahattar nikal aa.e
ilham ka mausam utar aata hai zamin par
basti men agar ek suḳhnavar nikal aa.e
un sang-zanon men koi apna bhi tha shayad
jo Dher se ye qimti patthar nikal aa.e
pindar-e-hunar zauq-e-nazar shiddat-e-iḳhlas
duniya ke muqabil mire lashkar nikal aa.e
kuchh soch ke ummid-e-vafa bandhte ‘anjum’
chashme ki jagah kaise samundar nikal aa.e
Leave a Reply