barf hoti hui hiddat ko nahin jante ho
tum pighalne ki aziyyat ko nahin jante ho
dekhiye aam adavat men to gunja.ish hai
tum magar josh-e-raqabat ko nahin jante ho
be-gunahi ke liye aag pe chalna hoga
tum qabile ki rivayat ko nahin jante ho
ab palaTne ka natija hai kisi ek ki maut
tum mire pyaar ki shiddat ko nahin jante ho
aankh se dekha suna kaan se zahir hai magar
tum pas-e-parda haqiqat ko nahin jante ho
mere lahje men jo Thahrav nahin aaya ‘roz’
kya miri talḳhi-e-hijrat ko nahin jante ho
Leave a Reply