Jahangeer Nayab
ba.is-e-asudgi hai hashr-samani mujhe
raas aati hai baḌi mushkil se asani mujhe
dekh kar teri inayat aur tira lutf-o-karam
khal rahi hai yaar apni tang-damani mujhe
kar raha hai zehn men gardish koi dhundla sa aks
lag rahi hai us ki surat jaani pahchani mujhe
sochne ka zaviya main ne badal Daala hai dost
ab pareshani nahin lagti pareshani mujhe
saunp di us ne mujhe apne badan ki saltanat
mil ga.i ho muflisi men jaise sultani mujhe
luqma-e-girdab hone hi ko tha main aur phir
daf.atan aa.i nazar ik mauj-e-imkani mujhe
aaj phir khulne lagi hai mujh pe ramz-e-ka.enat
aaj phir hone lagi hai ḳhud pe hairani mujhe
sochta huun uula misra jab kabhi ‘nayab’ main
ḳhud ko likhvata hai baḌh kar misra-e-sani mujhe
Leave a Reply