Poet
kya kahen yaaro kya kya ham par ishq ḳharabi laaya hai
aankh se le kar dil tak jaise ik dhundalka chhaya hai
jaise dhanak akash pe nikle badal ke chhaT jaane par
yuun hi tere gham men ro kar vaqt suhana aaya hai
meri baat na sunne vaale puchh is se tu haal mira
aansu ek fasana ban ke palkon par tharraya hai
biit ga.i hai dil pe qayamat lab pe shikayat la na sake
aap ko kya ma.alum ki ham ne jaan ke dhoka khaya hai
meri ghazal ke a.ine men dekh ke apna rang-e-jamal
kis kis naaz se sar ko jhuka kar kya kya vo sharmaya hai
raat hasinon ke jamghaT men kya kya naaz ke phuul khile
saz-e-tarab ki chheḌ se lekin aur bhi dil ghabraya hai
raah se teri haT jaane ka jab bhi ham ne ahd kiya
ik ik naqsh-e-qadam ne uTh kar pahron hamen samjhaya hai
shayad ab ke baar to un se sulh na ho is jang ke ba.ad
ab ke apne aap ko ham ne sanjida sa paaya hai
aisi kya thi tujh se shikayat aisa kya tha tujh se malal
aaj tiri adna si inayat dekh ke dil bhar aaya hai
Leave a Reply