aaya na raas nala-e-dil ka asar mujhe
ab tum mile to kuchh nahin apni khabar mujhe
dil le ke mujh se dete ho dagh-e-jigar mujhe
ye baat bhulne ki nahin umr bhar mujhe
har-su dikhai dete hain vo jalva-gar mujhe
kya kya fareb deti hai meri nazar mujhe
milti nahin hai lazzat-e-dard-e-jigar mujhe
bhuli hui na ho nigah-e-fitnagar mujhe
daala hai be-khudi ne ajab raah par mujhe
ankhen hain aur kuchh nahin aata nazar mujhe
karna hai aaj hazrat-e-naseh se samna
mil jaae do ghadi ko tumhari nazar mujhe
mastana kar raha huun rah-e-ashiqi ko tai
le jaae jazb-e-shauq mira ab jidhar mujhe
darta huun jalva-e-rukh-e-janan ko dekh kar
apna bana na le kahin meri nazar mujhe
yaksan hai husn-o-ishq ki sar-mastiyon ka rang
un ki khabar unhen hai na meri khabar mujhe
marna hai un ke paanv pe rakh kar sar-e-niyaz
karna hai aaj qissa-e-gham mukhtasar mujhe
siine se dil aziiz hai dil se ho tum aziiz
sab se magar aziiz hai teri nazar mujhe
main duur huun to ru-e-sukhan mujh se kis liye
tum paas ho to kyuun nahin aate nazar mujhe
kya janiye qafas men rahe kya moamla
ab tak to hain aziiz mire bal-o-par mujhe
Leave a Reply