yuun to milne ko ik zamana mila
na mila haan vo bevafa na mila
ashna.i men kuchh maza na mila
ashna dard-ashna na mila
jab mile vo khiche tane hi mile
lutf milne ka ik zara na mila
ham-nava sab ḳhizan ke aate hi
aise patta hue pata na mila
kho ke dil ko ham is qadar ḳhush hain
jaise qarun ka ḳhazana mila
shaad kya huun husul-e-jannat par
ki rupa.e men se ek aana mila
ashiqi kya hai sach jo puchho to
ham ko marne ka ik bahana mila
zindagani thi ya pareshani
sab kiya aur kuchh maza na mila
roiye us ki bad-nasibi par
DhunDhne par jise ḳhuda na mila
mujh se milne men kya bura.i hai
aap ke dil ka mudda.a na mila
mil gaya dil jo ham se milna tha
aankh ab ham se to mila na mila
khich ke milna bhi koi milna hai
ek hai vo jo yuun mila na mila
phir sama.i safi’ se milne ki
kyuun tumhen koi dusra na mila
qadr karta huun apni aap safi’
vaah mujh ko bhi kya zamana mila
Leave a Reply