karna jo mohabbat ka iqrar samajh lena
ik baar nahin us ko sau baar samajh lena
ham hon ki adu us men jo zulm ka shaki ho
karta hi nahin tum ko vo pyaar samajh lena
mar jaa.e magar jaana us ki na ayadat ko
tum jis ko mohabbat ka bimar samajh lena
ban ban ke bigaḌta hai vo kaam mohabbat men
asan nahin jis ko dushvar samajh lena
ghaflat-kada-e-hasti jab kahte hain aalam ko
sauda hai phir apne ko hushiyar samajh lena
mahfil men raqibon ki jaana hai agar tum ko
surat se mujhe apni bezar samajh lena
dil par to lagate ho tum tir-e-nazar lekin
aahon ko hamari bhi talvar samajh lena
chheḌa jo mire aage phir tazkira-e-dushman
rakkhi hui hai mujh se takrar samajh lena
poshida ‘hafiz’ is men asrar-e-mohabbat hain
asan nahin mere ash.ar samajh lena
Leave a Reply