Zakia Ghazal
mire suḳhan ko anokhe kamal deta hai
tira ḳhayal mira dil ujaal deta hai
main tujh ko soch ke likkhun to ye qalam mera
mire hunar ko na.e ḳhadd-o-ḳhal deta hai
zamana vaqt ki surat hai mehrban mujh par
har ek zaḳhm pae-indimal deta hai
bisat-e-zist pe har aan phenk kar pansa
koi to vaqt ke mohre ko chaal deta hai
hain jis ke nuur ke partav ye chand ye suraj
vahi to ham ko na.e mah-o-sal deta hai
usi ko bhuul chuke hain ‘ghazal’ zamin ke ḳhuda
jo har uruuj ko ik din zaval deta hai
Leave a Reply