Akhtar Ansari Akbarabadi
kaun sunta hai sirf zaat ki baat
lab pe hai mere kaenat ki baat
kyuun shikan paḌ gai hai abru par
main to kahta huun ek baat ki baat
sham.a roti hai taare dubte hain
ab fasana banegi raat ki baat
sub.h-e-nau muskurane vaali hai
kya kahen shab ke hadsat ki baat
muztarib ho rahe hain divane
hai tumhari navazishat ki baat
bazm-e-‘aḳhtar’ men kyuun ḳhamosh ho tum
hai ye beja takallufat ki baat
Leave a Reply