Sultan Rashk
yuun ḳhalaon men nihayat ghaur se dekha na kar
mere baare men miri jaan is qadar socha na kar
bandagi ko log de lete hain kamzori ka naam
ijz achchha hai magar tu ḳhud ko naqsh-e-pa na kar
ho sake to dil men paida kar mohabbat ka ḳhayal
ye muqaddas lafz sat.h-e-ab par likha na kar
reza reza ho rahe hain a.ine iḳhlas ke
apni ankhon se ye manzar dekh par shikva na kar
de sake tujh ko kabhi teri vafaon ka javab
us havale se kabhi ruḳh janib-e-duniya na kar
jin ki ta.abiren nahin mumkin kabhi sultan-‘rashk’
ho sake to is tarah ke ḳhvab bhi dekha na kar
Leave a Reply