chehra lala-rang hua hai mausam-e-ranj-o-malal ke baad
ham ne jiine ka gur jaana zahr ke istimal ke baad
kis ko ḳhabar thi muḳhtari men honge vo itne majbur
ham apne se sharminda hain un se arz-e-hal ke baad
apne siva apne rishte men aur bhi kuchh duniya.en thiin
ham ne apna haal likkha lekin digar ahval ke baad
ankhen yuun hi bhiig ga.iin kya dekh rahe ho ankhon men
baiTho sahab kaho suno kuchh mile ho kitne saal ke baad
toḌe kitne a.ine aur chhan liye kitne afaq
koi na manzar aankh men Thahra us ke aks-e-jamal ke baad
naqsh-gari ka buuta ho to dhuup chhanv men rang bahut
chehra ḳhud ban ja.ega teḌhi-meḌhi ashkal ke baad
Leave a Reply