vo hirasat men jo insan liye jaate hain
apni tafrih ka saman liye jaate hain
kal jise ghar se uTha le ga.i ḳhaki vardi
aaj man-bap use shamshan liye jaate hain
ba.ad muTh-beḌ ke tamghe ye taraqqi dekho
marne vaale hi ka ehsan liye jaate hain
jism chhalni hai magar haath rahe siine par
haa.e dil men koi arman liye jaate hain
kya pata un ko kitaben hain ki vish ki puḌiyan
bhar ke baste men jo nadan liye jaate hain
ye bhajan gaane men hi mast kiye band ankhen
aur ghar lauT ke mehman liye jaate hain
ek ma.asum ka sar kaaT ke phir devi se
apni ḳhush-hali ke vardan liye jaate hain
nim-behosh hai ghayal hai qafas men ‘panchhi’
aur par noch ke shaitan liye jaate hain
Leave a Reply