lab-e-furat vahi tishnagi ka manzar hai
vahi husain vahi qatilon ka lashkar hai
ye kis maqam pe laa.i hai zindagi ham ko
hansi labon pe hai siine men gham ka daftar hai
yaqin kis pe karen kis ko dost Thahra.en
har astin men poshida koi ḳhanjar hai
gila nahin mire honTon pe tang-dasti ka
ḳhuda ka shukr mira dil abhi tavangar hai
koi to hai jo dhaḌakta hai zindagi ban kar
koi to hai jo hamare dilon ke andar hai
use qarib se dekha to ye hua malum
vo bu-e-gul nahin shamshir-e-bad-e-sarsar hai
samajh ke aag lagana hamare ghar men tum
hamare ghar ke barabar tumhara bhi ghar hai
miri jabin ko haqarat se dekhne vaale
miri jabin se tira astan munavvar hai
tumhare qurb ki lazzat nasib hai jis ko
vo ek lamha hayat-e-abad se behtar hai
hamara jurm yahi hai ki haq-parast hain ham
hamare ḳhuun ka pyasa har ek ḳhanjar hai
vo mere samne aa.e to kis tarah aa.e
koi libas hai us ka na koi paikar hai
har ik bala se bacha.e hue hai jo ham ko
hamare sar pe ye maan ki dua ki chadar hai
bhaTak raha huun main sadiyon se dasht-e-ghurbat men
koi to mujh ko bata.e kahan mira ghar hai
abhi ‘hafiz’ gulabon ki baat mat kiije
lahuluhan abhi gulsitan ka manzar hai
Leave a Reply