Arshad Abdul Hamid
suḳhan ke chaak men pinhan tumhari chahat hai
vagarna kuza-gari ki kise zarurat hai
zamin ke paas kisi dard ka ilaaj nahin
zamin hai ki mire ahd ki siyasat hai
ye intizar nahin sham.a hai rifaqat ki
is intizar se tanha.i ḳhub-surat hai
main kaise vaar duun tujh par mire sitara-e-sham
ye harf-e-ḳhvab to ik chand ki amanat hai
main ḳhak-e-ḳhvab palak se jhaTakne vaala tha
pata chala ki yahi hasil-e-masafat hai
ye mustatil sa ḳhaka ki jis ko ghar kahiye
usi ke da.era o dar men meri jannat hai
ye ḳhosha-chini-e-ḳhvan-e-anis hai ‘arshad’
namak namat jo mire sher men fasahat hai
Leave a Reply