Uljha Dil-E-Sitam-Zada Zulf-E-Butan Se Aaj

uljha dil-e-sitam-zada zulf-e-butan se aaj

nazil hui bala mire sar par kahan se aaj

tadpunga hijr-e-yar men hai raat chaudhvin

tan chandni men hoga muqabil katan se aaj

do-char rashk-e-mah bhi hamrah chahiyen

vaada hai chandni men kisi mehrban se aaj

hangam-e-vasl radd-o-badal mujh se hai abas

niklega kuchh na kaam nahin aur haan se aaj

qaar-e-badan men ruuh pukari ye vaqt-e-nazaa

muddat ke baad uthte hain ham is makan se aaj

khinchi hai charkh ne bhi kisi maang ki shabih

sabit hui ye baat mujhe kahkashan se aaj

andher tha nigah-e-‘amanat’ men shaam sahar

tum chand ki tarah nikal aae kahan se aaj

Leave a Comment