Hijr Tha Ya Visal Kis Ka Tha

Ayaz Rasool Nazki

hijr tha ya visal kis ka tha

ḳhvab tha ya ḳhayal kis ka tha

samne vo hamare baiThe the

dil men un ke ḳhayal kis ka tha

ghair se ham ne maat khaa.i to

is men kahiye kamal kis ka tha

ham gire hain agar bulandi se

dar-haqiqat zaval kis ka tha

bach ke nikle jo la-ta.alluq the

bach nikalna muhal kis ka tha

reg-e-sahil pe naqsh baaqi hai

jism vo be-misal kis ka tha

sher sunte hain mera kahte hain

aisa nazuk ḳhayal kis ka tha

baam par chand tha magar phir bhi

chandni men jamal kis ka tha

taan ham par hi aa ke TuuTi hai

puchiyega malal kis ka tha

haq to ye hai nahin mile un se

phir ye collar pe baal kis ka tha

puchhiye kya kisi nujumi se

vaqt kis ka hai saal kis ka tha

vo jo rahte hain sirf maazi men

kaise janen ki haal kis ka tha

daar par chaḌh gaya ‘ayaz’ magar

kis ne puchha saval kis ka tha