Imam Bakhsh Nasikh
ji leti hai vo zulf-e-siyah-fam hamara
bujhta hai charagh aaj sar-e-sham hamara
aisa koi gumnam zamane men na hoga
gum ho vo nagin jis pe khude naam hamara
avval to na qasid ko rahe ku-e-sanam yaad
pahunche to faramosh ho paigham hamara
ham go ki hain divane magar gharq-e-yam-e-ashk
yunan ke manind hua naam hamara
mai paai na piine ko to ham pi gae aansu
ashkon se bhi saaqi na bhara jaam hamara
kaabe men bhi vahshat ki rahi dast-darazi
sad-chak kiya jama-e-ehram hamara
tifli men thi ik daaya hain ab chaar ke kandhe
aghaz se kya khuub hai anjam hamara
ik-adh rahe jism-e-mushabbak men tira tiir
khali na kabhi said se ho daam hamara
kaam auron ke jaari rahen nakam rahen ham
ab aap ki sarkar men kya kaam hamara
‘nasikh’ kahen jald aa ke kahen qasid-e-janan
khat lijiye dilvaiye inaam hamara
Leave a Reply