chalte chalte ye gali be-jan hoti ja.egi
raat hoti ja.egi sunsan hoti ja.egi
dekhna kya hai nazar-andaz karna hai kise
manzaron ki ḳhud-ba-ḳhud pahchan hoti ja.egi
us ke chehre par musalsal aankh ruk sakti nahin
aankh bar-e-husn se halkan hoti ja.egi
soch lo ye dil-lagi bhari na paḌ jaa.e kahin
jaan jis ko kah rahe ho jaan hoti ja.egi
kar hi kya sakti hai duniya aur tujh ko dekh kar
dekhti ja.egi aur hairan hoti ja.egi
kakul-e-ḳhamdar men ḳham aur aate ja.enge
zulf us ki aur bhi shaitan hoti ja.egi
aate aate ishq karne ka hunar aa ja.ega
rafta-rafta zindagi asan hoti ja.egi
ja chukin ḳhushiyan to ab gham hijraten karne lage
dil ki basti is tarah viran hoti ja.egi
Leave a Reply