dua karo ki koi pyaas nazr-e-jam na ho
vo zindagi hi nahin hai jo na-tamam na ho
jo mujh men tujh men chala aa raha hai sadiyon se
kahin hayat usi fasle ka naam na ho
koi charagh na aansu na arzu-e-sahar
khuda kare ki kisi ghar men aisi shaam na ho
ajiib shart lagai hai ehtiyaton ne
ki tera zikr karun aur tera naam na ho
saba-mizaj ki tezi bhi ek neamat hai
agar charagh bujhana hi ek kaam na ho
‘vasim’ kitni hi subhen lahu lahu guzrin
ik aisi subh bhi aae ki jis ki shaam na ho
Leave a Reply