Shahid Kamal
kucha-e-rang-e-malamat ke sab asar ke saath
aa ga.e dasht men ham bhi dar-o-divar ke saath
dasht-e-vahshat ne mire noch li shab ki poshak
toḌ di paanv ki zanjir bhi jhankar ke saath
meri tanha.i men ik vajd ki kaifiyyat hai
raqs karta huun main ik alam-e-asrar ke saath
gunjta hai mire siine ke nihan-ḳhane men
saans leta hai koi vaqt ki raftar ke saath
kaaT Dalunga main ḳhud apni ana ki shah-e-rag
aaj ḳhud apne muqabil huun main talvar ke saath
din to ḳhvabon se ulajhne men guzar jaata hai
raat kaT jaati hai aram se azar ke saath
jis ko duniya ne bhi bekar samajh rakkha tha
main ne sikha hai bahut kuchh isi bekar ke saath
nazninan-e-ḳhush-andaam ka sha.ir huun main
baiTh ke dekh kabhi ‘shahid’-e-tarrar ke saath
Leave a Reply