tire bazuon ka sahara to le luun magar in men bhi rach ga.i hai thakan
main sahra se bach kar chaman men to aa.uun pa sahra se kuchh kam nahin ye chaman
miri ziist ki raah tarik thi chand ban kar tum aa.e to raushan hui
ye rah aaj phir tira-o-tar hai ghaliban chand ko lag gaya hai gahan
har ik samt nagin ki surat lapakti hui tirgi se hirasan na ho
ajab kya ki lau de uThe mere lams-e-farozan se tera sulagta badan
ye ashkon se bhigi hui muskurahaT muravvat ka e.ajaz hai varna ham
ghamon ki havaon men uḌta hua dekh kar aa rahe hain koi pairahan
firaq-e-lab-o-zulf par munhasir kam hi paa.i hai ahl-e-vafa ki taḌap
tum aghosh ke tang halqe men ho phir bhi har lamha afzun hai dil ki jalan
mire pyaar ko ik na.e moḌ par dekh kar yuun miri jaan ta.ajjub na kar
badalte rahe hain badalte rahenge zamane ke hamrah dil ke chalan
Leave a Reply