Rais Amrohvi
didani hai bahar ka manzar
zahr chhiḌka gaya daraḳhton par
bun rahe hain urus-e-gul ka kafan
magas-e-barg o ankabut-e-shajar
chiil kavvon ko takte rahiye
chand taron se thak ga.i hai nazar
jo mira takiya-e-javani tha
usi bargad ki jhuk ga.i hai kamar
haath phaila ke chiḳhte hain daraḳht
sarsar-e-hadisa ka ruḳh hai kidhar
surḳh phulon ke laal angare
chashm-e-zard-e-uqab ke aḳhgar
vo jabin-e-shafaq pe ḳhatt-e-shua
ḳhuun se kis ke surḳh hai ḳhanjar
ab ke barsat kuchh to raas aa.i
ghaas ugne lagi munDeron par
dhuup is sahn men na dar aa.e
band kar do tamam rauzan-e-dar
raqs karte hue bagulon men
dev o jinnat o ruuh ke lashkar
dekhta huun ki kya dikhate hain
apne saa.e pe jam ga.i hai nazar
alam-e-be-ḳhudi men gahra saans
sina-e-ka.enat men hai safar
aap apne se kyuun gurezan huun
kisi aaseb ka hai mujh pe asar
kaun mere liye hai shab-bedar
kyuun baraste hain raat bhar patthar
main hi main huun ḳhala-e-tira men
na atarid na mushtari na qamar
tah-ba-tah zulmaten hain jumbish men
rengte hain siyah-posh azhdar
jabalushshams ki bulandi se
dekhta huun zamin ko jhuk jhuk kar
ek pur-nur nilgun nuqta
kanpta hai ḳhala men rah rah kar
kahkashan se shumal ki janib
vaqt ke be-nishan mehvar par
nuur ke da.ere hain gardish men
aḳhir in qafilon ka ruḳh hai kidhar
kaun aḳhir jhinjhoḌta hai mujhe
alam-e-ḳhvab men sar-e-bistar
kaun aḳhir mujhe jagata hai
aḳhir shab men roz aa aa kar
na shahaba na koi tayyara
kaun uḌ kar gaya idhar se udhar
Leave a Reply