Mere Bhi Hain Kuchh Khwab

ai ishq-e-azal-gir o abad-tab mere bhi hain kuchh khvab

mere bhi hain kuchh khvab

us daur se is daur ke sukhe hue dariyaon se

phaile hue sahraon se aur shahron ke viranon se

virana-garon se main hazin aur udas!

ai ishq-e-azal-gir o abad-tab

mere bhi hain kuchh khvab!

ai ishq-e-azal-gir o abad-tab mere bhi hain kuchh khvab

mere bhi hain kuchh khvab

vo khvab ki asrar nahin jin ke hamen aaj bhi maalum

vo khvab jo asudgi-e-martaba-o-jah se

aludgi-e-gard-e-sar-e-rah se maasum

jo ziist ki be-huda kashakash se bhi hote nahin maadum

khud ziist ka mafhum!

ai ishq-e-azal-gir o abad-tab

ai kahin-e-danish-var o aali-guhar o piir

tu ne hi batai hamen har khvab ki taabir

tuune hi sujhai gham-e-dil-gir ki taskhir

tuuti tire hathon hi se har khauf ki zanjir

ai ishq-e-azal-gir o abad-tab, mere bhi hain kuchh khvab

mere bhi hain kuchh khvab

ai ishq-e-azal-gir o abad-tab

kuchh khvab ki madfun hain ajdad ke khud-sakhta asmar ke niche

ujde hue mazhab ke bana rekhta auham ki divar ke niche

shiraz ke majzub-e-tunak-jam ke afkar ke niche

tahzib-e-nigun-sar ke alam ke ambar ke niche

kuchh khvab hain azad magar badhte hue nuur se marub

ne hausla-e-khub hai ne himmat-e-na-khub

gar zaat se badh kar nahin kuchh bhi unhen mahbub

hain aap hi is zaat ke jarub

zaat se mahjub!

kuchh khvab hain jo gardish-e-alat se juyanda-e-tamkin

hai jin ke liye bandagi-e-qazi-e-hajat se is dahr ki tazin

kuchh jin ke liye gham ki musavat se insan ki tamin

kuchh khvab ki jin ka havas-e-jaur hai aaiin

duniya hai na diin!

kuchh khvab hain parda-e-anvar magar un ki sahar gum

jis aag se uthta hai mohabbat ka khamir us ke sharar gum

hai kul ki khabar un ko magar juz ki khabar gum

ye khvab hain vo jin ke liye martaba-e-dida-e-tar hech

dil hech hai sar itne barabar hain ki sar hech

arz-e-hunar hech!

ai ishq-e-azal-gir o abad-tab

ye khvab mire khvab nahin hain ki mire khvab hain kuchh aur

kuchh aur mire khvab hain kuchh aur mira daur

khvabon ke nae daur men ne mor o malakh ne asad o saur

ne lazzat-e-taslim kasi men na kasi ko havas-e-jaur

sab ke nae taur!

ai ishq-e-azal-gir o abad-tab

mere bhi hain kuchh khvab!

har khvab ki saugand!

har-chand ki vo khvab hain sar-basta o ru-band

siine men chhupae hue goyai-e-doshiza-e-lab-khand

har khvab men ajsam se afkar kaa, mafhum se guftar ka paivand

ushshaq ke lab-ha-e-azal-tishna ki paivastagi-e-shauq ke manind

(ai lamha-e-khursand)

ai ishq-e-azal-gir o abad-tab, mere bhi hain kuchh khvab

vo khvab hain azadi-e-kamil ke nae khvab

har sai-e-jigar-doz ke hasil ke nae khvab

aadam ki viladat ke nae jashn pe lahrate jalajil ke nae khvab

is khaak ki satvat ki manazil ke nae khvab

ya sina-e-giti men nae dil ke nae khvab

ai ishq-e-azal-gir o abad-tab

mere bhi hain kuchh khvab

mere bhi hain kuchh khvab!

Leave a Comment