Ab Band Jo Is Abr-E-Guhar-Bar Ko Lag Jae

ab band jo is abr-e-guhar-bār ko lag jaa.e

kuchh dhuup hamāre dar-o-dīvār ko lag jaa.e

palkoñ pe sajā.e raho ummīd ke jugnū

kyā jāniye kis kī duā bīmār ko lag jaa.e

suulī pe bhī is baat kī koshish hai hamārī

īsār hamārā tire me.aar ko lag jaa.e

haq-goī se merī hī pareshān hai duniyā

kyā ho ye vabā aur jo do-chār ko lag jaa.e

thoḌī sī rahe jeb-e-ḳharīdār kushāda

thoḌā sā gahan raunaq-e-bāzār ko lag jaa.e

Leave a Comment