Shakeel Jamali
ab band jo is abr-e-guhar-bar ko lag jaa.e
kuchh dhuup hamare dar-o-divar ko lag jaa.e
palkon pe saja.e raho ummid ke jugnu
kya janiye kis ki dua bimar ko lag jaa.e
suuli pe bhi is baat ki koshish hai hamari
isar hamara tire me.aar ko lag jaa.e
haq-goi se meri hi pareshan hai duniya
kya ho ye vaba aur jo do-char ko lag jaa.e
thoḌi si rahe jeb-e-ḳharidar kushada
thoḌa sa gahan raunaq-e-bazar ko lag jaa.e
Leave a Reply