Huzur-E-Ghair Tum Ushshaq Ki Tahqir Karte Ho

Poet

huzur-e-ghair tum ushshaq ki tahqir karte ho

mohabbat karne valon ki yahi tauqir karte ho

abas tum ḳhvahish-e-vasl-e-but-e-be-pir karte ho

jo qismat men nahin hai us ki kya tadbir karte ho

zamin-o-asman ka farq hai ḳhurshid-o-zarre men

muqabil chand se kya yaar ki tasvir karte ho

dam-e-aḳhir laḌe vahshi ke zindan men ye ghul hoga

sitam karte ho viran ḳhana-e-zanjir karte ho

jo mujh sauda-zada ne ki kabhi tashrih zulfon ki

to bole hans ke kya uljhi hui taqrir karte ho

musafir ke liye hai fikr-e-gor ai mun.imo lazim

imarat kya sara-e-dahr men ta.amir karte ho

sahar tak niind uḌ jaati hai ham-sa.e ki to be-shak

asar kya ḳhaak aur ai nala-e-shab-gir karte ho

jo mashq-e-harf-e-la karta huun kahte hain daqiqa-ras

muama-e-dahan-e-yar kya tahrir karte ho

abas dil toḌ kar yad-e-butan men mahv ho itna

ḳhuda ke ghar ko Dha kar but-kada ta.amir karte ho

hamare ba.ad aaoge to kya ai nama-bar kahna

ham aḳhir hote hain aane men tum taḳhir karte ho

ḳhat-o-ruḳh ki sifat men raT lagi rahti hai jo tum ko

‘qalaq’ kya hifz qur.an ka ma-e-tafsir karte ho