Aise Pur-Nur-O-Ziya Yar Ke Rukhsare Hain

aise pur-nur-o-ziya yaar ke rukhsare hain

jin ke aage mah-o-khurshid bhi do taare hain

koi in ankhon se is sabza-e-khat ko puchhe

ye vo kante hain ki palkon se siva pyare hain

koi sabqat na kabhi khaal se jitne ho bacho

saanp gesu-e-siyah-fam se man haare hain

kyuun kar angiya men na ho surat-e-jauza paida

gore gore tire pistan hain ki mah-pare hain

fasl-e-gul aae kali koi na koi chatke

aaj murghan-e-sahar baagh men chahkare hain

ishq-e-atfal-e-chaman men hain anadil betab

ashiyanon ka ye aalam hai ki gahvare hain

qatl karta hai mujhe kyuun shab-e-furqat khamosh

ai moazzin mad-e-takbir nahin aare hain

ek din parcha lagaenge nakirain zarur

ye farishte nahin akhbar ke harkare hain

khal-e-mushkin ne dil aisa hi jalaya hai ki bas

koelon par bhi ye dhoka hai ki angare hain

khvan-e-neamat se kabhi khat na uthaenge bakhil

maal kha sakti hain taqdir ne munh maare hain

na saza-var-e-hazar huun na mubarak hai safar

mere palle pe na sabit hain na sayyare hain

rang gulzar ka shabnam sa uda jaata hai

ru-ba-ru tere hazari nahin favvare hain

vaah kya yaar ke honton ki main tarif karun

jaan shirin nahin jin se vo shakar-pare hain

khana-e-ishq ke mehman hain ham aur tadur

daagh hain ham ko nasib aur use angare hain

‘bahr’ ayyam-e-judai men na kapde phado

ye samajh lo ki shab-e-vasl ke kaffare hain

Leave a Comment