Jaleel Aali
shaḳh-e-be-numu par bhi aks-e-gul javan rakhna
aa gaya hamen aali dil ko shadman rakhna
be-falak zaminon par raushni ko tarsoge
soch ke darichon men koi kahkashan rakhna
rah-rav-e-tamanna ki dastan hai bas itni
sub.h o shaam ik dhun men ḳhud ko nim-jan rakhna
kar-o-bar-e-duniya men ahl-e-dard ki daulat
suud sab luTa dena paas har ziyan rakhna
us ki yaad men ham ko rabt o zabt girya se
shab lahu lahu rakhni din dhuan dhuan rakhna
ishq ḳhud sikhata hai saari hikmaten ‘ali’
naqd-e-dil kise dena bar-e-sar kahan rakhna
Leave a Reply