Navin C Chaturvedi
jaate jaate vo mujhe apni nishani de gaya
zindagi-bhar ke liye ankhon men paani de gaya
sunte sunte dastan so ja.enge sab charagar
ḳhatm jo hogi nahin aisi kahani de gaya
sar mire siine pe us ne jab rakha hai zindagi
is tarah dariya-e-dil ko vo ravani de gaya
baat bhi itni ki bas us ne kiya mujh ko salam
haan magar logon ke dil men bad-gumani de gaya
thi ghazal meri bahut be-rabt be-kaif-o-asar
vo mire ash.ar ko alfaz-o-ma.ani de gaya
bazm men be-parda aaya muskura kar samne
na-tavan dil ko mire phir se javani de gaya
le gaya hamrah apne vo makan aur bam-o-dar
hai nazar sab kuchh magar ik be-makani de gaya
Leave a Reply