Asad Raza Sahar
ik ḳhak-zada chalne laga la-ilah ki samt
ya.ani ki gamzan main hua karbala ki samt
mujh ko kisi tabib se koi gharaz nahin
bimar paḌ ke aata huun ḳhak-e-shifa ki samt
jab muntazir the hur ke vahan par husain ḳhud
kaise fana se aata na phir hur baqa ki samt
karb-o-bala men jaata huun ankhon men nam liye
na.ara laga ke jaata huun mushkil-kusha ki samt
maula tumhara gham bhi manane ko ye malak
arsh-e-barin se aate hain farsh-e-aza ki samt
kaise bhala na ro.en use dekh kar husain
ghazi sa sher bhaa.i chala alqama ki samt
dekho ghazal se martaba is ka buland hai
chhoḌo ghazal ko aao ‘sahar’ marsiya ki samt
Leave a Reply