Kausar Jayasi
vadi-e-kun se gham-e-marhala-paima nikla
meri kashti ko liye vaqt ka dariya nikla
pa-e-idrak men chubhta hua kanTa nikla
ishq ke daam men ḳhud apna sarapa nikla
mehnat-e-ahl-e-vafa aa hi ga.i kaam aḳhir
har shigaf-e-gham-e-hasti se savera nikla
aql ko naaz tha had-bandi-e-ḳhair-o-shar par
dil ne jancha to har ik kaam adhura nikla
us se milne ki faza saaf nahin thi koi
har guzargah pe ehsas ka pahra nikla
tishnagi main ne bujha li ye hunar tha varna
ḳhizr ka dil bhi rah-e-umr men pyasa nikla
ḳhvab dekha tha kahan chamki hai ta.abir kahan
hashr ka din miri fitrat ka ujala nikla
maut ki had men bhi mujh ko na diya izn-e-qayam
saḳht mushkil tiri nazron ka taqaza nikla
mauja-e-nik.hat-e-gesu jise samjha main ne
vo bhi mere nafas-e-sard ka jhonka nikla
main tahi-dast huun bazar-e-vafa men ‘kausar’
sikka sikka zar-e-ummid ka khoTa nikla
Leave a Reply