Itna sannaTa Hai Basti Mein Ki Dar Jaega

itnā sannāTā hai bastī meñ ki Dar jā.egā

chāñd niklā bhī to chup-chāp guzar jā.egā

kyā ḳhabar thī ki havā tez chalegī itnī

saarā sahrā mire chehre pe bikhar jā.egā

ham kisī moḌ pe ruk jā.eñge chalte chalte

rāsta TuuTe hue pul pe Thahar jā.egā

bādbānoñ ne jo ehsān jatāyā us par

biich dariyā meñ vo kashtī se utar jā.egā

chalte rahiye ki saf-e-ham-safarāñ lambī hai

jis ko raste meñ Thaharnā hai Thahar jā.egā

dar-o-dīvār pe sadiyoñ kī kohr chhā.ī hai

ghar meñ sūraj bhī jo aayā to ThiThar jā.egā

fan vo jugnū hai jo uḌtā hai havā meñ ‘qaisar’

band kar loge jo muTThī meñ to mar jā.egā

Leave a Comment