Qaisarul Jafri
itna sannaTa hai basti men ki Dar ja.ega
chand nikla bhi to chup-chap guzar ja.ega
kya ḳhabar thi ki hava tez chalegi itni
saara sahra mire chehre pe bikhar ja.ega
ham kisi moḌ pe ruk ja.enge chalte chalte
rasta TuuTe hue pul pe Thahar ja.ega
badbanon ne jo ehsan jataya us par
biich dariya men vo kashti se utar ja.ega
chalte rahiye ki saf-e-ham-safaran lambi hai
jis ko raste men Thaharna hai Thahar ja.ega
dar-o-divar pe sadiyon ki kohr chha.i hai
ghar men suraj bhi jo aaya to ThiThar ja.ega
fan vo jugnu hai jo uḌta hai hava men ‘qaisar’
band kar loge jo muTThi men to mar ja.ega
Leave a Reply