aise bhi kuchh gham hote hain
jo ummid se kam hote hain
aage aage chalta hai rasta
pichhe pichhe ham hote hain
raag ka vaqt nikal jaata hai
jab tak sur qaa.em hote hain
bahar ki ḳhushki pe na jaao
patthar andar nam hote hain
milne koi nahin aata jab
apne aap men ham hote hain
chehron ki to bhiiḌ hai lekin
sahi salamat kam hote hain
nazmen ghazlen ḳhat afsane
us ke naam raqam hote hain
dil ke shelf men ‘shahid’ kitni
yadon ke album hote hain
Leave a Reply