Sabr Karenge Jab Tak Ishq Nahin Hota

sabr kareñge jab tak ishq nahīñ hotā

dekheñ us ko kab tak ishq nahīñ hotā

shirkat kuchh to lāzim hai matlūb kī bhī

tālib ke matlab tak ishq nahīñ hotā

us ke ba.ad amāvas bhī to paḌtī hai

puure chāñd kī shab tak ishq nahīñ hotā

dil-dariyā meñ ġhote khāne paḌte haiñ

dekho lab se lab tak ishq nahīñ hotā

ham to jaane kab ke jal kar ḳhaak hue

lekin un ko ab tak ishq nahīñ hotā

chehre kī saarī raunaq uḌ jā.egī

hañste rahiye jab tak ishq nahīñ hotā

Leave a Comment