Azhar Hashmi
tasbih-e-qumri sarv-e-sanobar sameT lo
jaana hai is dayar se manzar sameT lo
parvaz-e-kamyabi ki bas itni shart hai
chahat hisar-e-nafas ke andar sameT lo
us ashk ki taḌap ke muqabil men kuchh nahin
ab chahe chashm-e-nam men samundar sameT lo
taqat pe pahle apni to raazi ḳhuda karo
phir bazuon men tum dar-e-ḳhaibar sameT lo
mera makan nahin hai ḳhata-bin ke vaste
aao magar mizaj ko bahar sameT lo
‘az.har’ ye daur-e-aish hai yaan jiine ke liye
azurda zehn aur dil-e-muztar sameT lo
Leave a Reply