hamen khabar nahin kuchh kaun hai kahan koi hai
hamesha shaad ho abad ho jahan koi hai
jagah na chhode ki sail-e-bala hai tez bahut
uda pada hi rahe ab jahan tahan koi hai
fishar-e-girya kisi taur be-maqam nahin
dayar-e-gham hai kahin par pas-e-fughan koi hai
vo koi khadsha hai ya vahm-e-khvab hai ki khayal
ki ho na ho mire dil apne darmiyan koi hai
kabhi to aisa hai jaise kahin pe kuchh bhi nahin
kabhi ye lagta hai jaise yahan vahan koi hai
kabhi kabhi to ye lagta hai fard fard hain ham
ye aur baat hamara bhi karvan koi hai
kahin pahunchna nahin hai use magar phir bhi
misal-e-bad-e-baharan ravan-davan koi hai
hua hai apne safar se hazar se begana
vahin vahin pe nahin hai jahan jahan koi hai
chhalak jo uthti hai ye aankh fart-e-vasl men bhi
to sarkhushi men abhi ranj-e-raegan koi hai
shikast-e-dil hai to kya rah-e-ishq tark na kar
ye dekh kya kahin parvarda-e-ziyan koi hai
ab us nigah-e-fusun-kar ka qusur hai kya
hamen dikhao agar zakhm ka nishan koi hai
kahin pe aaj bhi vo ghar hai hansta basta hua
ye vahm sa hai tire dil ko ya guman koi hai
javar-e-qarya-e-yaran men ja nikalta huun
ki jaise ab bhi vahin mera mehrban koi hai
Leave a Reply