Poet
mubtala ye dil hua jab yaar nanga ho gaya
shama be-parda hui qurban patanga ho gaya
gir pade ushshaq us ki tegh-e-khun-asham par
kal shahadat ke talab-garon ka danga ho gaya
dafn kar ke fatiha padh ke mira bola vo shokh
aaj bimar-e-mohabbat mera changa ho gaya
bazm men jal kar kiya shab raz-e-ulfat ashkar
shama ke manind parvana bhi nanga ho gaya
gir ke us ke kucha-e-tarik men nikla na dil
pech-e-zulf-e-yar ka mujh ko adanga ho gaya
vasf dair-o-kaaba ka ham ne judagana kiya
ek hi mazmun tha fiqara do-ranga ho gaya
badhte badhte apna tul-e-zindagani kam hua
ghatte ghatte jama-e-hasti utanga ho gaya
khushnuma hai us rukh-e-raushan pe kya khal-e-siyah
zeb gulzar-e-iram ka la-bhujanga ho gaya
shah-e-haft-aqlim se ai dil gada-e-dahr tak
dhang se aaya vahan se yaan kadhanga ho gaya
jis qadar vo mujh se bigda main bhi bigda us qadar
vo hua jaame se bahar men bhi nanga ho gaya
yuun kahenge yaar iqlim-e-sukhan men in dinon
‘muntahi’ bhi ek hi katta-dabanga ho gaya
Leave a Reply