Wamiq Jaunpuri
rahna tum chahe jahan ḳhabron men aate rahna
ham ko ehsas-e-juda.i se bachate rahna
ḳhud-gazida huun baḌa zahr hai mere andar
is ka tiryaq hai raton ko jagate rahna
muddaton ba.ad jo dekhoge to Dar jaoge
apne ko aa.ina har roz dikhate rahna
ḳhud-farebi se hasin-tar nahin koi jazba
ḳhud jo rahna hai to ye dhoka bhi khate rahna
ye to ma.alum hai marne pe milegi ujrat
kar-e-fankar hai tasvir banate rahna
apni na-ahli pe qatil ko na taish aa jaa.e
ochhe zaḳhmon ko zara us se chhupate rahna
harne jitne se kuchh nahin hota ‘vamiq’
khel har saans pe hai daanv lagate rahna
Leave a Reply