Rahna Tum Chahe Jahan KHabron Mein Aate Rahna

rahnā tum chāhe jahāñ ḳhabroñ meñ aate rahnā

ham ko ehsās-e-judā.ī se bachāte rahnā

ḳhud-gazīda huuñ baḌā zahr hai mere andar

is kā tiryāq hai rātoñ ko jagāte rahnā

muddatoñ ba.ad jo dekhoge to Dar jāoge

apne ko aa.ina har roz dikhāte rahnā

ḳhud-farebī se hasīñ-tar nahīñ koī jazba

ḳhud jo rahnā hai to ye dhokā bhī khāte rahnā

ye to ma.alūm hai marne pe milegī ujrat

kār-e-fankār hai tasvīr banāte rahnā

apnī nā-ahlī pe qātil ko na taish aa jaa.e

ochhe zaḳhmoñ ko zarā us se chhupāte rahnā

hārne jītne se kuchh nahīñ hotā ‘vāmiq’

khel har saañs pe hai daañv lagāte rahnā

Leave a Comment