rusva.iyon ka meri tamasha na kijiye
lillah apne aap ko rusva na kijiye
har zulm par vafa ka taqaza na kijiye
mahnga paḌega aap pe sauda na kijiye
hansiye na aap yuun mire hal-e-tabah par
tarik zindagi men ujala na kijiye
kanTon se rasm-o-rah ka gar hausla na ho
phulon ki apne dil men tamanna na kijiye
kuchh mushkilat-e-rah-e-vafa ki ḳhabar bhi hai
chalne ka mere saath irada na kijiye
meri nigah-e-shauq ka jaadu bhi kam nahin
ankhon men ankhen Daal ke dekha na kijiye
varaftagi-e-shauq men ‘anvar’ ke samne
jab aa ga.e hain aap to parda na kijiye
Leave a Reply