Us Se Gile Shikayaten Shikwe Bhi chhoD Do

us se gile shikāyateñ shikve bhī chhoḌ do

dar us kā chhuT gayā to darīche bhī chhoḌ do

kaisā hai vo kahāñ hai banā kis kā ham-safar

behtar hai kuchh savāl adhūre bhī chhoḌ do

ik bevafā kā naam likhoge kahāñ talak

aurāq apne maazī ke saade bhī chhoḌ do

jiine ke vāste na sahāre karo talāsh

jab Duub hī rahe ho to tinke bhī chhoḌ do

shāyad na.e makān meñ un kā na dil lage

ghar chhoḌne lago to parinde bhī chhoḌ do

jis ne tumheñ charāġhoñ se mahrūm kar diyā

us kī galī ke chāñd sitāre bhī chhoḌ do

dariyā se duur rahnā hī behtar hai ab ‘shakīl’

dhāre se kaT ga.e to kināre bhī chhoḌ do

Leave a Comment