Mahfil Mein Aate Jate Hain Insan Nae Nae

mahfil men aate jaate hain insan nae nae

ab to chalan liye hain miri jaan nae nae

us zulf o rukh ke ishq ka charcha hua ye kuchh

hairan nae nae hain pareshan nae nae

aa aa ke apni apni sunata hai har koi

zakhm-e-jigar pe hain namak-afshan nae nae

mujh ko suna ke kahte hain logon ko is se kya

andaz ham ne sikhe hain haan haan nae nae

aa jaaen ham bhi yaad kisi baat par kabhi

ashiq hue hain ab to miri jaan nae nae

har dam nai nai hai khalish meri jaan ko

laati hai ranj-o-gham shab-e-hijran nae nae

baton par un ki kyuun na yaqin aae phir mujhe

qasmen nai nai hain to paiman nae nae

gar ab ke vasl ho to na manun men ek bhi

dil ke nikalun hasrat-o-arman nae nae

sau sau tarah satati hai ik ik ki yaad ab

shab aap ne kiye the jo ehsan nae nae

kis kis ki roz roz khushamad kiya karen

hote hain un ke dar pe to darban nae nae

ummid bhi kabhi kabhi naumidi hai mujhe

dikhlati rang hai shab-e-hijran nae nae

koi to aaj aaega phir kis liye ‘nizam’

tajvizen hain nai nai saman nae nae

Leave a Comment