ḳhizāñ se siina bharā ho lekin tum apnā chehra gulāb rakhnā
tamām ta.abīr us ko denā aur apne hisse meñ ḳhvāb rakhnā
har ik zamīñ se har āsmāñ se har ik zamāñ se guzarte rahnā
kahīñ pe taare bikher denā kahīñ koī māhtāb rakhnā
jo be-gharī ke dukhoñ se tum bhī udaas ho jaao haar jaao
to āñsuoñ se makāñ banānā aur us ke uupar sahāb rakhnā
jo an-kahe haiñ jo an-sune haiñ vo saare manzar bhī dekh loge
bas apnī āñkhoñ kī chup meñ raushan mohabbatoñ ke azaab rakhnā
muhīb rātoñ ke jañgaloñ meñ abad ke jaisā sukūt ho jab
lahū kā apne diyā jalānā aur apnā chehra kitāb rakhnā
tum apne andar kī hijratoñ se niDhāl ho kar jo lauTnā to
na ḳhud se koī savāl karnā na paas apne javāb rakhnā
ye zindagī to safar hai ‘sābir’ safar meñ jab bhī kisī se milnā
tamām sadme bhulāte rahnā muhāl hogā hisāb rakhnā