Sabir Waseem
ḳhizan se siina bhara ho lekin tum apna chehra gulab rakhna
tamam ta.abir us ko dena aur apne hisse men ḳhvab rakhna
har ik zamin se har asman se har ik zaman se guzarte rahna
kahin pe taare bikher dena kahin koi mahtab rakhna
jo be-ghari ke dukhon se tum bhi udaas ho jaao haar jaao
to ansuon se makan banana aur us ke uupar sahab rakhna
jo an-kahe hain jo an-sune hain vo saare manzar bhi dekh loge
bas apni ankhon ki chup men raushan mohabbaton ke azaab rakhna
muhib raton ke jangalon men abad ke jaisa sukut ho jab
lahu ka apne diya jalana aur apna chehra kitab rakhna
tum apne andar ki hijraton se niDhal ho kar jo lauTna to
na ḳhud se koi saval karna na paas apne javab rakhna
ye zindagi to safar hai ‘sabir’ safar men jab bhi kisi se milna
tamam sadme bhulate rahna muhal hoga hisab rakhna
Leave a Reply