ye bhuul jaao ki Dar ja.egi miri ḳhushbu
har ek samt ko mahka.egi miri ḳhushbu
yahan vahan ye uḌegi par apni marzi se
hava ke ruḳh se na ghabra.egi miri ḳhushbu
main apne baagh men jab phuul ban ke mahkunga
tumhare tak bhi pahunch ja.egi miri ḳhushbu
ye titliyan koi tufan bikher de varna
isi qafas men simaT ja.egi miri ḳhushbu
mujhe bhi vaqt ki andhi ka ilm hai ‘ulfat’
magar ye sach hai ki shab aa.egi miri ḳhushbu
Leave a Reply