tark-e-ulfat men koi yakta na tha
main akela tha magar tanha na tha
baagh tha lekin tira chehra na tha
ḳhema-e-gul men koi rahta na tha
jis mohabbat se tiri shohrat hui
is men shayad kuchh tira hissa na tha
dil ko viran kar gaya zehni shu.ur
dard tha par dard ka yaara na tha
kuchh mire kirdar men likkha tha gham
kuchh mira radd-e-amal beja na tha
ghar bana lenge kisi basti men aur
ham ne is maqsad se ghar chhoḌa na tha
dosti par jis ki mujh ko naaz ho
dost mera ek bhi aisa na tha
husn tera umr-bhar likhte rahe
sher mera ek bhi tujh sa na tha
muddaton main ne shikayat tak na ki
muddaton vo mere paas aata na tha
ab to har ik dost ka kahna paḌa
mujh se behtar tha magar mujh sa na tha
jis ko dohrata raha barson ‘munir’
us ke apne dard ka qissa na tha
Leave a Reply