sauda hua hai jis ko ruḳh-e-zulf-e-yar ka
kya ḳhauf us ko gardish-e-lail-o-nahar ka
kya puchhte ho haal dil-e-be-qarar ka
dhaḌka laga hua hai gham-e-rozgar ka
phir dekhiye na ek bhi va.ada vafa hua
phir e’tibar kuchh na raha e’tibar ka
niyyat kisi ki ma.il-e-jaur-o-jafa to ho
ghaT jaa.e tuul abhi sitam-e-rozgar ka
ai barq-e-tur kab ki thi muusa se dushmani
dikhla diya jo rang dil-e-be-qarar ka
phir aagya hai jaur ka shayad unhen ḳhayal
phir baḌh chala hai zulm-o-sitam rozgar ka
piiri men bhi shabab ki baten zarur hon
hasil ho lutf kuchh to ḳhizan men bahar ka
‘mas.ud’ naaz unhen hai darazi-e-zulf par
dekha nahin hai tuul shab-e-intizar ka
Leave a Reply