Nuzhat Abbasi
kya dekhen ham suraj chand sitaron men
un ka chehra raushan hai andhiyaron men
roz tumhari ḳhabren paḌhte rahte hain
tum to bas ab milte ho aḳhbaron men
darvaze par naam tumhara likkha hai
naqsh tumhare sabt hue divaron men
bachche ḳhauf se ghar se bahar na niklen
dhuul uḌti hai galiyon men chaubaron men
apne jaisi faani chiiz banata hai
ik ye kami hai insan ke shahkaron men
peshani par daagh numayan rahta hai
sajde karte phirte hain darbaron men
ilm hunar aur fan to ab matruk hue
khoTe sikke chalte hain bazaron men
ahd-e-nau ki ‘nuzhat’ ham buniyad rakhen
fikr na.i ab shamil ho fan-paron men
Leave a Reply